Overblog
Suivre ce blog
Editer l'article Administration Créer mon blog
مدونة ام اماني للطبخ

طاجين الزيتون باللحم المفروم من مطبخي

26 Février 2016 , Rédigé par ام اماني Publié dans #اطباق رئيسية

بسم الله الرحمان الرحيم

السلام عليكم 

كيف حالكن اخواتي اتمنى ان يكون الجميع في تمام الصحة والعافية

 

  دائما مع الاطباق التقليدية اخترت لكن طاجين الزيتون  باللحم المفروم كنوع من التغيير  ان شاء الله تعجبكم الوصفة

طاجين الزيتون باللحم المفروم من مطبخي

المقادير

قطع دجاج 

حبة بصل مفرومة

سنينة ثوم

كمية من اللحم المفروم

كمية من الزيتون الاخضر

فلفل اسود

زنجبيل

ملح

معدنوس

الطريقة

نحضر صلصة بيضاء عادي

في طنجرة نحط م ك زيت وملعقة زبدة نحط الدجاج ونخليه يتقلى جيدا على نار هادئة من بعد نضيف البصل وسنينة ثوم والتوابل فلفل اسود وكمية قليلة من الزنجبيل ملح ونتركها تتقلى جيدا بعدها امرقي بكمية من الماء قيس ما نغطي الدجاج نتركها تنضج على نار هادئة

من جهة نحضر كويرات اللحم

نغلي الزيتون مرتين حتى نتخلص من الملح الزائد بعد ذلك نفرمه ونضيفه للحم المفروم ونضيف اليه كمية من البصل المفروم والمعدنوس والملح والفلفل الاسود وملعقة مايزينة والهدف من وضع المايزينة  هي انها تجعل اللحم المفروم طري وليس قاسي

 

طاجين الزيتون باللحم المفروم من مطبخي

نعجن هذا المكونات جيدا ثم نكورها جيدا في اليد حتى نلقى ملمسها ناعم وبهذا نضمن انها تحافظ على شكلها اثناء الطهي

طاجين الزيتون باللحم المفروم من مطبخي

نحطها في الفرينة ثم نحمرها في كمية قليلة من الزيت قيس ماتتحمر فقط من فوق 

 بعدها نضيفها للمرق ونتركها تكمل تطيب 

في الاخير نضيف للمرق عصرة حامض

 

طاجين الزيتون باللحم المفروم من مطبخي

تقدم مزينة بشرائح الليمون والمعدنوس

طاجين الزيتون باللحم المفروم من مطبخي

ان شاء الله تعجبكم الوصفة وتجربوها

 

ولا تنسوني من صالح الدعاء ولكن بالمثل

Partager cet article

Commenter cet article

Kanza 30/04/2016 15:22

Allah yjazik ya okhti

Lamia 25/04/2016 00:25

ربي يعطيك ماتتمناي فهاذي دنيا

فاطي سافي 03/03/2016 14:58

السلام عليكم ماشاء الله روعة عجبتني فكرة الزيتون هايلة ربي يحفظك

ام عببد الله 02/03/2016 12:33

السلام عليكم شوفي ام اماني مرضتيني بوصفاتك الله يبارك ما شاء الله ربي يحفظك عندي ما تعلمت بعدما كنت صفر ههه بصح كل مرة نلقى وصفة تقعد في قلبي همالا دبري راسك اعطيهالي ههه من فضلك طبعا (طاجين الشواء) و(دجاج بالصلصة يجي مع الارز)و(ارز مع سمك الروجي عملتيه شوية احمر)هادو كامل لقيتهم في منتدى الجلفة مشكورة

leila 01/03/2016 21:08

Allah yberek chahitini hbiba ida takdri la r7 nta3 griwach ykoun sahal rani khadama w nhab les recettes facile merci

ام رياض 01/03/2016 08:28

عزيزتي ام اماني صباح الخير كيف الحال اردت ان اقول لكي انكي عملة نادرة في هاد الزمن الدي كثر فيه الخبث و الغش و الحيلة و النفاق اتمنى ان توفقي في اداء هده الرسالة وان يستفيد منها كل مبتدء وتاكدي ان اجركي عند رب العالمين كبير جدا بارك الله فيك و في كل عائلتكي و شكرا و دمت لي كل محبيك

...amel 29/02/2016 13:34

مساء الخير استاذتي ... ان شاء الله راكي مليحة و صحتك بخير
يعطيك الصحة على الوصفة و ربي يجعلها في ميزان حسناتك ... انا كلشي راني فهمتو بصح حابة السر تع الجاج لي مع الطاجين لاخاطر راهو يشهي ما شاء الله ... نزيدو نحمروه و لا كيفاه نديرولو ... ربي يبارك فيك و يعطيك قد نيتك

ام مرام 29/02/2016 12:41

يعطيك الصحة اختي دائما اطباقك تشهي

Gâteaux Bladi 29/02/2016 12:20

عزيزتي ام أماني علاش ماراهيش تفوتلك تعليقاتي،صراحة راني شبه حزينة هههه

ام اماني 02/03/2016 14:51

حبيبتي راهي تفوت وراني رديت عليك شكراااا

ام هبة 28/02/2016 23:04

السلا م عليكم انا من محبيك و معجبيك وراني جربت الكثير من وصفات معجنات حلويات اطباق وكلها ناجحة والحمد لله ربي يعطيك على حساب قلبك ويباركلك في اولادك و يفرحك بيهم ان شاء الله

أم محمد 28/02/2016 14:36

سلام حبوبة....ما شاء الله جاني سؤال واش نستعمل لفرم الزيتون ؟ و ما تضحكيش علي الفرم يكون ناعم جدا ؟ .... لكن يعطيك الصحة عزيزتي بهذه الطريقة ممكن أولادي ياكلو الزيتون لأنهم لا يحبونه اطلاقا...كي نديرو ناكلو أنا و المسيو فقط...و ولادي راح يحسبو هادوك الكعابر لحم مرحي لي يحبوه ههه و الله يعطيك الصحة و ربي يفرحك

ام تسنيم 28/02/2016 11:44

ما شاء الله اللحم المفروم راه يشهي في حياتي مشفتش واحدا طيباتو ب هده الأناقة
بوركت يا أختاه

ام رياض 28/02/2016 09:49

عزيزتي ام اماني شكرا ليك و الله انني افرح عندما اجد ردودكي الطيبة لي و لكل صديقات المدونة هادا فخر لنا بارك الله فيك وربي يخليك لينا

Myriam 28/02/2016 09:22

شكرًا على وصفة المايونيز جزاك الله الف خير

Moslihe29 28/02/2016 08:18

بارك الله فيك اختى

ام اماني 28/02/2016 08:23

وفيك بارك الله

Basma 27/02/2016 22:41

ربي يجازيك ويبارك فيك والله تجديد يستاهل التطبيق شكرا جزيلا انا تعلمت من امي انو لازم ان اضع الزيتون في اناء به ماء و اضيف شوية سكر حتى تنقص الملوحة ام اماني ربي يخليها لك ويحفظها ممكن وصفة الكوكا والجينواز من فضلك

ام اماني 28/02/2016 08:29

اهلا اختي بسمة
اكيد كي تحطي الزيتون يغلي ضفيله كمية من السكر حتى ساعد على خروج الملح الزائد وممكن انك تحطي الزيتون في الماء ليلة كاملة وغدوى من ذاك غيرله الماء وتستعمليه مباشرة
بالنسبة للكوكا شوفي العجينة المورقة سبق وحطيتها ابسطيها حطي داخلها الحشو من بعد طبقة اخرى من العجينة اعملي خطوط من فوق باه تسهلك تقطعيها فيما بعد حطي في كل حبة حبة زيتون ونسيت نقولك ادهنيها لازم الفرن يكون سخووووون على 180 من بعد ماتشوفيها بدات تنتفخ نقصي عليه وخليها تكمل تطيب
وان شاء الله نعملها بالخطوات لكن اصبري عليا وهي والجنواز

ام لجين 27/02/2016 21:45

رووووووووعة ام اماني

Basma 29/02/2016 14:37

شكرا كثيرا واسفة على الازعاج لكن انت بمقام الوالدة لذلك انا اسالك ويعود الفضل لك بالاول

ام اماني 28/02/2016 08:29

مرورك الاروع

ام لجين 27/02/2016 21:44

يعطيك الصحة ام اماني روووووعة صراحة جربت طاجين الكفتة تاعك مع الخبز جا هايل بوركتي

ام اماني 28/02/2016 08:30

بارك الله فيك وشكراااا على الثقة

ام عببد الله 27/02/2016 11:06

السلام عليكم بارك الله فيك ام اماني يعني ماشي لازم غير الجديد كل وحدة ولمستها حتى في الاطباق اليومية اختي ممكن تكتبيلي وصفة غراتان بالخضر الله يخليك وتاكدي كلما نطلب وصفة والله غير بالحشمة ما نحبش نسمط هههههههههه

ام اماني 28/02/2016 08:50

اهلا غاليتي
حبيبتي هذا المدونة منكم واليكم والحمد لله راهي ناجحة بفضل دعواتكم وبفضل مشاركتكم دكتن اوفياء لها
لذلك اسئلي براحتك اذاكنت قادرة نساعدك اكيد مانبخلش عليك وعلى الاخوات لكن فقط احيانا لازم تصبروا عليا لانشغالاتي
بالنسبة للغراتان الخضر
اعملي صوص بلونش بصدر الدجاج اقلي الخضر لي عندك فتتي الدجاج وخلطيه مع الخضر افرغي الخليط في مول مدهون بالزبدة
من جهة اخلطي 3بيض او اكثر حسب حجم المول مع كمية من المرق وكمية قليلة من الكريمة السائلة وفرغيها على الخليط ودخليه للفرن يتحمر

ميمة 27/02/2016 10:19

يعطيك الصحة هدي الأطباق لطلابها ربي يفرح في اولادك

ام اماني 28/02/2016 08:51

امين يارب ولك بالمثل

Om marwa et dounia 27/02/2016 00:13

Machaallah ya om ammanie, que Allah te protège et te donne la bonne santé om marwa et dounia

ام اماني 28/02/2016 08:52

امين يااااارب

Kika 26/02/2016 18:15

ربي جازيك و يمنيك راني حاسة بوقتك الثمين لي تمديهولنا الله يباركلك في وقتك و ننتظرو داءما جديدك في الاطباق الرءيسية و المملحات راني ندعيلك

ام اماني 28/02/2016 08:57

بارك الله فيك وشكراااا على التفهم
ان شاء الله كل مرة نلبي بعض الطلبات فقط شوية صبر حبيباتي

ام نور 26/02/2016 17:21

و الله انتي مبدعة ياام اماني و متألقة دائما بوصفاتك تعلمت منكي الكثير ربي يجازيك و يحفظك و يجعلها في ميزان حسناتك يااااارب و الله احبكي في الله

ام اماني 28/02/2016 08:58

احبك الذي احببتني فيه اختي ام نور
بارك الله فيك على المرور الطيب

ام مروة 26/02/2016 17:20

الله يعطيك الصحة اختي فكرة مليحة أنا فى أول قالت وره هذآ زيتون ههههههه لوكان ماقريج مكونتش نعرف بصحتكم

ام اماني 28/02/2016 08:59

ههههه مليح التغيير اختي مرة على مرة جربيه وان شاء الله يعجبكم

nadjat Batna 26/02/2016 17:17

ام اماني لحبيبة حبيت نسقسيك نتي طريقتك الزيتون درتيه مع اللحم هكدا أنا موالفة نطيبوا مع المرقة بصح المشكلة انوا كي ناكلوا يجيني صامت مفهمتش علاه رغم اني نغليه مرتين فقط مرة اولى ومرة تانية نزيدلوا شوي سكر ونشللوا وكي يطيب اللحم نلوحوا معاه يدير غليه ونطفي عليها ؟؟ممكن تعطيني طريقة وإلا غلطة في طيابوا انصحيني وملاحظة اخيرة اني كي نحب نخثر مرقتي نزيدلها شوي فرينة

ام اماني 28/02/2016 09:03

بارك الله فيك نجاه على المرور الطيب
بالنسبة للزيتون يجيك صامط لانك تغليه بزاف لازم شوية فقط والاحسن كسي تشريه حطي فيه الماء وخليه يبات في الماء غدوى من ذاك اغسليه وراح يكون حاضر من دون ماتغليه اما بالنسبة للفرينة انا ايضا نستعملها كي تحبي المرقة تجيك خاثرة ضيفي م فرينة كي تكون تتقلى من بعد امرقي عادي لكن هنا انا ما ضفتش لان كويرات اللحم غبرتهم في الفرينة واقلتهم من بعد ضفتهم للمرق لذلك الفرينة لي غبرتهم فيها كافية
شكراااا مرة اخرى

فيفي 26/02/2016 16:51

امممممم ام اماني والله شهيتينا بارك الله فيك ورزقك اعلى درجات الفردوس ام اماني من فضلك وصفة خبزة تونس ان امكن وشكرا

فيفي 28/02/2016 17:08

مساء الخير حبيبتي وغاليتي ام اماني شكرا سوف انتظر الوصفة مفصلة شكرا

ام اماني 28/02/2016 09:04

اختي اذا راكي مزروبة نكتبلك الوصفة واذا تصبري نعملهالك بالصور
وفيك بارك الله

rahma 26/02/2016 15:31

شكرا الاخت ام اماني

ام اماني 28/02/2016 09:05

العفو اختي

rahma 26/02/2016 15:30

شكرا الاخت اماني انتي دائما متالقة في الطبخ الله يجزيك كل خير

ام صهيب 26/02/2016 15:16

ابدعت ربي يعطيك ما تتمناي

ام اماني 28/02/2016 09:06

امين ياااارب ولك بالمثل

Hamdi 26/02/2016 14:38

Bjr le cordon bleu merci bcp pour cette nouvelle méthode de tajine zitoune, a essayer inchallah et waktache la recette des bradj?a bientôt.

ام اماني 28/02/2016 09:07

اهلا اختي حامدي
اختي غير نقي الغرس نعملهم اصبري عليا شوية وشكرااا على مرورك الطيب

Om iyes 26/02/2016 14:15

ممممممم ماشاء الله يشهي فكرة رااائعة حبيبتي ام اماني جزاك الله خيرا وبارك فيك
تحيااتي

ام اماني 28/02/2016 09:08

اهلا غاليتي

بارك الله فيك على المرور الطيب جزاك الله كل خير

lila 26/02/2016 13:37

يعطيك الصحة باين بنين ربي يحفظك و يحققلك واش متمنية انشالله

ام اماني 28/02/2016 09:08

امين ولك بالمثل

oumfares kabyle 26/02/2016 13:16

يعطيك الصحة دايما متالقة واطباقك روعة

ام اماني 28/02/2016 09:09

مرورك الارووووع شكراااا

رحاب 26/02/2016 13:15

شكراً طريقة جديدة ساجربها مساءاً الله يعاونك

ام اماني 28/02/2016 09:09

ان شاء الله تنال اعجابكم

oumfares kabyle 26/02/2016 13:15

يعطيك الصحة دايما متالقة واطباقك روعة

ام رياض 26/02/2016 11:02

من فضلك ام اماني ادا كان بامكانك ان تعطيني وصفات لحلويات المنزل تكون بسيطة و جافة للاستعمال اليومي و شكرا و اسفة على الطلب

ام اماني 28/02/2016 09:10

اهلا بالغالية ام رياض ولما التاسف باذن الله نلبلك طلبك ياغالية

Myriam 26/02/2016 10:56

رااااااائع ربي يجازيك بكل خير على كل ما تفعلينه من اجلنا
و كنت طلبت وصفة للمايونيز اذا أمكن و شكر في جميع الأحوال

ام اماني 28/02/2016 09:16

اهلا بالغالية مريم اكيد اختي
كاين عدة وصفات للمايونيز تفضلي هذا الوصفة
بيضة نصف م ك مطارد م ك خل او عصير ليمون رشة ملح رشة فلفل اسود وممكن نعوضه بالفلفل الابيض زيت حوالي 200مل
نخلط كل المكونات ماعدا الزيت من بعد نضيف الزيت كما الخيط ونستمر بالخلط حتى نتحصل على القوام المطلوب وفي الاخير اذا حبتي اضفي كمية من الفرماج

ام رياض 26/02/2016 10:43

السلام عليكم جمعة مباركة على كافة الامة الاسلامية يعطيك الصحة سلمت يداك و الله الوصفة واضح انها رائعة و تشهي انا لا زلت اثق بكي و بكل وصفاتكي شكرا لكي سيدتي الكريمة علمتينا ان نكون ربات بيوت ناجحين هادا كله بفضلكي نحن ندين لكي بالكثير اتمنى ان نوفيه يوما ما ان شاء الله

ام اماني 28/02/2016 09:18

بارك الله فيك اختي ام رياض على الكلام الطيب ربي يحفظك ويحفظلك كل غالي ودعوة خير لي ولعائلتي تكفيني جزاكن الله كل خير

lila z 26/02/2016 09:37

ما شاء الله روعة ممكن وصفتك للبغرير حبيبتي ام اماني جزاك الله خيرا