قطايف السنيوة
بسم الله الرحمان الرحيم
السلام عليكم اخواتي
كيف حالكن ان شاء الله الجميع في تمام الصحة والعافية
وصفة اليوم عبارة عن قطايف السنيوة من حلوياتنا التقليدية سهلة التحضير وذوقها راااائع خاصة مع الشاي
ويمكن تحضيرها بطبقة من القطايف ثم الحشو ثم طبقة اخرى من القطايف او نحضرها بعجينة البقلاوة من الاسفل ثم الحشو ثم طبقة من القطايف كما عملت انا
من دون اطالة اترككم مع الوصفة
مقادير العجينة:
فرينة 4 كيلات
كيلة ناقصة اصبع سمن ذايب وبارد
قرصة ملح
م ص فاني
ونطمها بماء الزهر
الحشو
لوز بالقشور مدشش 3كيلات وممكن نحضرها بخليط من الجوز واللوز كما عملت انا
نصف كيلة سكر
فاني
ماء الزهر
نحتاج ايضا الى
سمن ذائب
قطايف سورية
عسل
بيستاش للتزيين
الطريقة
نحضر العجينة بخلط المقادير السابقة ونطمها بماء الزهر نغطيها ونخليها ترتاح
نأخذ السنيوة وندهنها بالسمن
نرش طاولة العمل بالمايزينة ونبسط العجينة بالحلال من بعد نمررها في الماشينة
الطبقة الاولى نرققها حتى الرقم 7 لازم تكون خشينة نوعا ما من بعد ندهنها بالسمن ونعمل الطبقة الثانية نرققها حتى الرقم 8 ونفس العملية نكررها حتى نتحصل على 5 طبقات وفي كل مرة ندهن بالسمن بعدها نثقبها بالكوردون
نحضر الحشو نخلط السكر مع المكسرات والفاني ونرش فوقه ماء الزهر مالازمش يكون مشمخ لازم يكون كما الكسكس
نضع الحشو فوق العجينة
نأخذ القطايف نقطعها بالمقص الى قطع صغيرة نضيفلها حوالي زوج م ك سكر يخليها تاخذ لون ذهبي نخلط القطايف مع السكر ونحطها فوق الحشو
نسقيها بالسمن
ناخذ صينية اخرى ونضغط جيدا على القطايف من بعد ندخلها للفرن يكون مسخن مسبقا على 150درجة حتى تأخذ اللون الذهبي
بعد مانخرجها من الفرن اذا كان سمن زائد نتخلص منه ونعسلها بعسيلة تكون ثقيلة نضيفلها كمية قليلة فقط من ماء الزهر حتى تبقى الحلوى مقرمشة
نغطيها بورق الالمنيوم ونحط فوقها حاجة ثقيلة حتى القطايف تتعسل جيدا ونخليها تبات ليلة كاملة من بعد نقطعها ونقدمها في حاويات مزينة بالبيستاش
تقدم بالصحة والراحة
شكلها عن قرب
ان شاء الله تعجبكم الوصفة
ولاتنسوني من صالح دعائكن
في امان الله